लईका मन ल महतारी भासा म पढ़ाई इस्कूल मन म

मोर चिन्हारी छत्तीसगढ़ी

नवा सतर ले पहली ले पांचवी के इस्कूल लईका मन ल महतारी भासा म पढ़ाई कराही

हमर छत्तीसगढ़ राज के मुखिया ह छत्तीसगढ़ के प्राथमिक इस्कूल के लईका मन म महतारी भासा छत्तीसगढ़ी, गोंडी, हल्बी,सरगुजिया, कोरवा, पांडो, कुरुख, कमारी, अउ बने अकन छत्तीसगढ़ी भासा म पढ़ाई लिखाई करें के घोसना गणतंत्र दिवस 26 जनवरी के बेरा म कर दे हे, जेला सुन के सब्बो छत्तीसगढ़िया मनखे मन अब्बड़ गदगद हो गे हे। काबर के येखर बर हमर छत्तीसगढ़ के पुरखा मन कतको बछर ले तन मन धन ले तपस्या करें हे, अउ अपन महतारी भासा म पढ़ाई लिखाई बर बढ़ लड़ाई लड़े हे तब कहु जा के 26 जनवरी 2020 म हमर राज के मुखिया ह येखर महत्तम ल समझ के छत्तीसगढ़ राज म छत्तीसगढ़ी म पढ़ाई-लिखाई के घोसना करे हे, छत्तीसगढ़िया भासा म पढ़ाई लिखाई के घोसना होये के बाद सब्बो छत्तीसगढ़िया मनखे मन बढ़ खुश होइन, अउ जइसे घोसना होइस कतको मनखे मन ल अतका खुशी होइस हे के जेन मनखे मन छत्तीसगढ़ी म नइ गोठियाये छत्तीसगढ़ी भासा नइ जाने वोहु मन छत्तीसगढ़ी भासा म गोठियाना सुरु कर दे हे। येखर संग्गे-संग छत्तीसगढ़ के छत्तीसगढ़िया मनखे मन येहू बात म संसो घलोक करत हे की प्राथमिक इस्कूल म पढ़ाई महतारी भासा म तो होही फेर माध्यम के रूप म होही के येक विषय के रूप म ये गोठ ह अभी पूरा खुले के आघु नइ आये हे।
काबर के महतारी भासा म पढ़ाई लिखाई कराये ले लईका मन के मानसिक विकास जल्दी होही लईका मन अपन भासा म पढ़ के जल्दी पढ़े लिखे ल सिखही, येखरे संग म सब्बो कोती छत्तीसगढ़ी भासा ह बगरहि घलोक। छत्तीसगढ़ी भासा ह अवइया बेरा ले इस्कूल अउ इस्कूल के संग्गे- संग आंगनबाड़ी म घलोक लईका मन ल महतारी भासा म पढ़ाना हे अउ ये पढ़ाई ह एक विषय नइ पढ़ाई के माध्यम बनना चाही, तभे आघु चल के उच्च शिक्षा म छत्तीसगढ़ी भासा म पढ़ाई लिखाई के रददा खुल सकही अउ अवइया बेरा म कोनो भी मनखे इहां छत्तीसगढ़ी के पढ़ाई कर सकथे, अउ जतना भी मनखे छत्तीसगढ़ी म पढाई करत हे उखर बर रोजगार के अवसर घलोके छत्तीसगढ़ राज म उपजाये ल पढ़ही, येखर बर सब्बो जगह छत्तीसगढ़ी म पढ़ाई लिखाई होही त छत्तीसगढ़ म छत्तीसगढ़ी बोली भासा के संग्गे-संग छत्तीसगढ़िया मनखे के विकास होही, छत्तीसगढ़ के महान पुरखा मन, जेन मन छत्तीसगढ़ ल आजाद करवाये बर, छत्तीसगढ़ के सांस्करीति ल बचाये बर, छत्तीसगढ़ महतारी बर अपन परान दे दीन अइसन मनखे मन के जीवनी ल छत्तीसगढ़ी भासा के पाठ्यक्रम म सामिल कर के हमर राज के लईका मन ल हमर महान पुरखा मन के सुग्घर जीवन के बारे म पढ़ाई-लिखाई कराही अउ सब्बो जानकारी बताही।

युवा कवि साहित्यकार
अनिल कुमार पाली, तारबाहर बिलासपुर छत्तीसगढ़