प्रकृति के खूबसूरत दृश्य दिखही आप ल बिलासपुर के बोइर पड़ाव खोन्द्रा के नेचर कैंप म Boirpadav Picnic spot (बोइरपड़ाव पिकनिक स्पॉट)

 

प्रकृति के खूबसूरत दृश्य दिखही आप ल बिलासपुर के बोइर पड़ाव खोन्द्रा के नेचर कैंप म

बोइरपड़ाव नेचर कैम्प

बिलासपुर जिला म वइसे तो घूमे बर अब्बड़ अकन जगह हवय फेर बिलासपुर म एक्के ठन नेचर कैम्प हवय जेखर बारे  म मैं आप मन ल बतात हव, बिलासपुर जिला ले 30 km के दूरिहा म प्रकृति के बढ़ खूबसूरत मनमोहक दृश्य देखे बर मिलही आप ल बोइर पड़ाव नेचर कैंप खोन्द्रा म गरगज पहाड़ी ऐखर चारों कोती बगरे हवय जेला वन विभाग ह 2013-14 म नेचर कैंप पिकनिक स्पॉट बनाए हे, इंहा घूमे के संग स्कूल के लईका मन ल विज्ञान के प्रशिक्षण दे बर घलोक स्थान हवय जिन्हा जानकारी के अब्बड़ अकन चीज देखे ल मिलही।

लईका मन बर नेचर प्रशिक्षण के व्यवस्था करे गे हवय

लईका मन ल प्राकृतिक ले जोड़े बर ए जगह ल विकसित करे हवय ताकि स्कूल पढ़इया लईका मन इंहा रही के जंगल म रहे के आनंद ले सके अउ एखर संगे-संग पर्यावरण ल बने समझ सकें।

देखे बर अब्बड़ अकन दृश्य हवय

प्राकृतिक दृश्य

इंहा देखे बर पत्थर ल अपन ताकत ले काटत पानी के बहाव आप ल देखे बर मिल जही जँहा डबरा म पहाड़ी के ऊपर ले आने वाला पानी मन भरे रहिथे, जिन्हा के स्वछ पानी ल देखे म बढ़ आनंद आथे, जाड़ के मौसम म अउ नवा बछर के बेरा म बाहिर ले घूमे बर मनखे मन के अब्बड़ भीड़ रहिथे, बोइर पड़ाव पंहुचे के पहली आप ल 10 किलोमीटर जंगल के बीच ले हो कि गुजरे ल पढही जँहा रददा के दुनो कोती हरियर पेड़ पौधों देखे बर मिलही, सरकारी उदासीनता के कारण इंहा आने वाले मनखे मन ल रददा के खराब होए के कारण परेशानी के सामना करे ल पढ़ सकथे, बोइर पड़ाव जाए बर बाइक के सवारी जादा अच्छा हवय चार चक्का वाले गाड़ी म घलोक इंहा जा सकथन फेर बड़े गाड़ी ल रोड खराब होए के कारण पहाड़ म चढ़े बर समस्या होथे।

परिवार संगवारी संग पिकनिक मनाए बर बढ़ सुग्घर जगह

छोटा झरना

परिवार के संग पिकनिक मनाए बर बढ़ अच्छा जगह हवय अगर आप मन जंगल प्राकृतिक के बीच म रहना बने लगथे त ए जगह आप मन बर बढ़ सुग्घर हवय जिन्हा आके आप मन प्राकृतिक के पूरा आनंद ले सकथव। नेचर कैंप घूमे बर अवइया बाहिर के मनखे मन बर इंहा रात म रुके के जगह घलोक बने हे जँहा 1200 रुपया के किराया म रुके के व्यावस्था हो जही।  जिन्हा आप ल नाश्ता पानी भी उपलब्ध हो जही।

वन्य जीव संरक्षण होवत हवय हिरण के विचरण देखे ल मिल जही-

शासन के कोती ले बोईर पड़ाव म वन्य जीव संरक्षण घलोक करे जात हे, बिलासपुर के कानन पेंडारी ले लाके इंहा हिरण कोटरी जइसे छोटे शाकाहारी जीव मन ल विचरण बर रखे जात हे आप मन इंहा के सड़क ले गुजरहु त आप मन ल वन्य जीव देखे ल मिल सकथे।

युवा कवि साहित्यकार
अनिल कुमार पाली तारबाहर बिलासपुर छत्तीसगढ़