भेंड़ी मन के भीड़ ओमा बिघवा मन के राज- छत्तीसगढ़ी कविता कवि जोहन भार्गव जी।

 भेंड़ी मन के भीड़…!!

भेंड़ी मन के भीड़ ओमा बिघवा मन के राज…!

मुड़ी गड़ाये रेंगय…गड़रिया समाज…!!

गंजहा दरूहा मनखे मन के दम म जिता चुनई 

भगनहा मेर अँइठा पइसा जम के करा कमई 

ओमेर लेप लगावा जेन मेर न पीरा न खाज…!

मुड़ी गड़ाये रेंगय…गड़रिया समाज…!!

बाढ़े लइकन खोखसी मछरी चिखला म सनायँ

अउ समाज के केंवटा मन फरी पानी म मिलायँ

पागी छोर के भागयँ चउखट लांघ के आज…!

मुड़ी गड़ाये रेंगय…गड़रिया समाज…!!

दाई ददा ल देखव जा के अपने म भुलाय रथे

लइकन आवय कतको बेर चाहे कहूँ जाय कथे

मोबाइल सत्यानासी बंद करा दिस मेल-मिलाप…!

मुड़ी गड़ाये रेंगय…गड़रिया समाज…!!

भेंड़ी मन ल काटय कसाई जउन गड़रिया

धन के जोर म मुखिया बन गे अइसन बहरुपिया 

कई झन जात बदल के जात म करयँ आघात…!

मुड़ी गड़ाये रेंगय…गड़रिया समाज…!!

कोर्ट कचहरी थाना मुकदमा पइसा हे त सुनाई 

आम आदमी अउँट गे बाँटत-बाँटत अपन कमाई 

सिधवा मनखे ल निचोड़ के पीययँ सबे विभाग…!

मुड़ी गड़ाये रेंगय…गड़रिया समाज…!!

 कवि- जोहन भार्गव जी

सेंदरी बिलासपुर (छत्तीसगढ़)

विज्ञापन के लिए संपर्क करें, 

दैनिक समाचार पत्र एवं पोर्टल       

whatsapp No:- 7722 906664 , aarugnews@gmail.com

आप का व्यपार हम बढ़ाएंगे।