कोरोना के नइ हे दवा.. सब्बो ले दुरिहा रहे ल लगही.. कवि-अनिल जाॅगडे जी के बढ़ सुग्घर कविता एक घव जरूर पढ़व

         ऐखर नइये दवा, दुरिहा रहे ल लगही

कोरोना काल म अग्नि परीक्षा,हम सबला देहे ल परही 

ऐखर नईये दवा दवाई,अब सावधानी म जिये ल परही 

महमारी आज बैरी कोरोना,लिख दिस नवा एक कहानी 

गांव शहर म डारे डेरा , कइसे बाचही आज जीनगानी 

मनखे-मनखे ल झन छुवव,फेर ऐहा अपने अपन डरही

कोरोना काल म अग्नि परीक्षा,हम सब ला देहे ल परही 

सो-डिस्टेन के पालन करव,भिड़ भाड जगह मत जावव 

अपन रक्षा परिवार सुरक्क्षा, मुंह म मास्क लगावव

मन के भरम ल आगी जोरव,फेर अपने अपन जरही

कोरोना काल म अग्नि परीक्षा,हम सब ला देहे ल परही 

बिपत ल बाचे बर भाई ,अपन घर ल सरग बनावव 

सेनेटाइजर करव हाथ धोवव ,दुरिहा ल राम जतावव 

जुर मिल के देवव सराप,फेर ऐहा अपने अपन सरही 

कोरोना काल म अग्नि परीक्षा,हम सब ला देहे ल परही 

हवा घलो म जहर घोरे, ये पापी धोकहा चंडाल ह

मनखे ल सब छुत बनादिस,कब छुटही ऐ जंजाल ह

जादा अती के अंत होथे, फेर ऐहा अपने अपन मरही 

कोरोना काल म अग्नि परीक्षा, हम सबला देहे ल परही 

- अनिल जाॅगडे (सरगांव मुंगेली)