छत्तीसगढ़ी कविता -तोला बंदव करव जोहार मोर छत्तीसगढ़ महतारी कवि अनिल जी

तोला बंदव करव जोहार 

मोर छत्तीसगढ़ महतारी 

सुरुज देवता धरे आरती 

रोज तोला परघावत हे 

महानदी अऊ अरपा पैरी 

तोरे  चरन  पखारत हे 

जंगल झाड़ी बाग बगीचा

तोर महके दाई फूलवारी 

तोला बंदव करव जोहार 

मोर  छत्तीसगढ़ महतारी ।।

पहिने दाई हरियर लुगरा 

तोर अंचरा के छईया हे

देवी देवता तोर कोरा म

सुख के छईया भूईया हे 

धान कटोरा सोनहा माटी 

तोर हवय दाई चिनहारी 

तोला बंदव करव जोहार 

मोर  छत्तीसगढ़  महतारी ।।

तोर कोरा म उपजेन बाढेन 

सरग सुख ल पावत हन 

तोर अंचरा के छाव बईठे

जिनगी अपन बितावत हन 

अनधन के पुरति ल करथे

हमर हवय दाई पालनहारी 

तोला बंदव करव जोहार 

मोर  छत्तीसगढ़ महतारी ।।

खेत खार हे हरियर भूईया 

गवई  गांव  जुड छाव हे 

धान  कटोरा  छत्तीसगढ़ 

तोर कतका सुघ्घर नाव हे 

सुख देवईया दुख हरईया

तैय माटी हमर महतारी 

तोला बंदव करव जोहार 

मोर  छत्तीसगढ़ महतारी 

मोर छत्तीसगढ़ महतारी ।।

  🖊️- अनिल जाॅगडे  सरगांव (मुंगेली)