मोर नोनी चुंचुनिया भाजी..
देख तो बइही...मोर नोनी ह..।
कइसे चुंचुनिया भाजी कस चमचमा थे...।
छत्तीसगढ़ के दुलावरिन नोनी ह...।
अपन संस्करीति ल सब्बो डहर बगरात हे...।
चुकचुक ले दिखे मुख ह...।
अउ आंखी ल कइसे मटकात हे..।
लुगरा पहिन हे बढ़ खांटी...।
सुग्घर गेंदा कस महमात हे..।
माथा म चंदा कस बिंदिया बोहे...।
गर म मोती के माला सुहात हे..।
चमचम ले बांधे मुट्ठी ल...।
मोर चुंचुनिया भाजी गुसियत हे..।
लाली-लाली लुगरा संग...।
हरियर चूड़ी म बांह सजात हे..।
दाई के लुकाये लालिमा ले...
अपन होंठ ल चुकचुकात हे...।
कनिहा म धर के हाथ ल...।
बने छत्तीसगढ़ी म गोठियात हे...।
महतारी भाखा के आगी ल...।
मोर दुलावरिन नोनी ह बगरात हे..।
युवा कवि साहित्यकार- अनिल कुमार पाली,
तारबाहर बिलासपुर छत्तीसगढ़, मो.न. 7722906664
0 Comments
अपने विचार सुझाव यहाँ लिख कर हमें भेजें।