कवि अनिल जांगड़े जी की कविता- आथे पुरखा के सुरता

आथे पुरखा के सुरता

👏👏👏👏👏👏👏👏

आथे पुरखा के सुरता,  पितर पाख म

देहे आशीष बर आथें,घर चलके पांव म।

घर ‌दुवारी ल लिप पोत के,फूल सुघर सजायेन

पहुना आगे पितर पुरखा,लोटा म पानी मड़ायेन

पान तरोइ म दार भात,पानी  देहेन  हाथ  म 

आथे पुरखा के सुरता, पितर  पाख  म ।

पितर पुरखा सगा बरोबर ,चार दिन बर आथें

घर अंगना खोर दुवारी, अड़बड़ सुघ्घर भाथे

देव असन लागे पुरखा, घर-घर आये गाँव म

आथे पुरखा के सुरता, पितर पाख म ।

आनी बानी के रोटी पिठा, बरा  बनाके  जेवाथंँन

खालिस कहिके पितर पुरखा,मने मन मुसकाथँन

हाथ जोड़ के माथ नवाके,गिरबो ऊंकर पाँव म 

आथे पुरखा के सुरता ,पितर  पाख  म 

आशीष देहीं पुरखा मन ,रइहव मया के छाँव म

कोरोना बैरी ल दूरभगाके,सुघ्घर रइहव गाँव म 

सुखे सुख म दिन पहावव,काँटा गड़े झन पाँव म

आथे पुरखा के सुरता, पितर पाख म ।

✍️ अनिल जाँगडे

     सरगांव मुंगेली छत्तीसगढ़