अभी के सबले बड़का रावन "नशा" तेखर नाश कोन करही?

 आज के रावन "दारू" अउ ओला पीके 

नशा म रहईया मनखे हवय तेखर नाश 

कोन करही?

बुराई म अच्छाई के जीत के तिहार रावन दहन के बेरा म मनखे मन ल आज के बेरा म बगरे सबले बड़े रावन जेन समाज म बुराई के प्रतीक हे तेला मारना हे, हमर लईका मन के जिनगी ल बर्बाद करे वाला रावन नशा हवय तेला पहली मारे ल लगही काबर की येही नशा ल कर के मनखे मन रावन ले भी बड़का रावन बन जाथे, अउ सामाजिक बुराई म पड़ के कईठन पाप कर बइठथे, आज के मनखे ह नशा रूपी रावन के चंगुल म अइसे फसे हवय की अपन घर दुवार समाज सब ल बर्बाद कर देथे, हमर समाज म अपन पेठ जमा के बइठे नशा रूपी रावन ल सबले पहली मारे ल लगही,  रावन के पुतला ल जरा ल के अपन आप ल बड़का महान समझने वाला मनखे मन ल ये गोठ ल समझना चाही के समाज म फइले बुराई ल दूर करना रावन ल जराये ले भी बड़का पुन्य के बुता हवय।

हमर समाज म नशा के रूप म बइठे रावन राजा ल आपन घर म खुसेरे के पहली हमर समाज के सीता रूपी दाई-दीदी मन ल रोकना हवय, नशा रूपी रावन ल घर भीतरी रोके के सबले बड़का जिम्मेदारी हमर महतारी-बहनी मन के हवय एही मन अगर ठान लीही की कोनो भी नशा ल अपन घर अउ अपन समाज म बगरे ले रोकबो त कोनो मनखे नशा के तीर म नइ जाही, हमर महतारी मन जइसे मया करे के बेरा महतारी होथे वइसने बुराई के अंत करे के बेरा काली माता बन जाथे, वइसने समाज म बइठे नशा रूपी रावन ल मारे बर हमर महतारी मन ल माता काली के रूप धरे ल लगही अउ अपन घर भीतरी नशा ल घुसरे ले अपन लईका के जिनगी खराब करे ले रोके ल लगही।

युवा कवि साहित्यकार

अनिल कुमार पाली

तारबाहर बिलासपुर

मो न:- 7722906664