छत्तीसगढ़ी भाषा म मुख्यमंत्री, कैबिनेट मंत्री, विधायक मन के शपथ होये ले छत्तीसगढ़ राज्य के गौरव बढ़ही-

 

छत्तीसगढ़ी भाषा म मुख्यमंत्री, कैबिनेट

मंत्री, विधायक मन के शपथ होये ले 

छत्तीसगढ़ राज्य के गौरव बढ़ही-

चुनाव के बेरा म छत्तीसगढ़ी भासा ह वोट मांगे के भासा हो सकथे त, शपथ ले के भासा काबर नइ हो सकें?

अपन संस्करीति बोली-भासा अउ संपदा ले भरे छत्तीसगढ़ पूरा देश म अपन छत्तीसगढियावाद के चिन्हा बगरा डाले हे, दूसर प्रदेश के मन घलोक अब छत्तीसगढ़ के मनखे ल उखर बोली भासा संस्करीति ले चिनथे, तेखर बाद भी छत्तीसगढ़ के भासा म सरकार के शपथ नइ होना बढ़ पीरा के गोठ आये, छत्तीसगढ़ राज्य म नवा सरकार के गठन होये के बाद से पूरा छत्तीसगढ़ म मुख्यमंत्री, कैबिनेट मंत्री, विधायक मन के शपथ छत्तीसगढ़ी भासा म होये के चर्चा चलत हे, ऐखर बाद भी कहूं कोनो नियम कानून के दाव पेच म फसा के छत्तीसगढ़ी भासा म शपथ ग्रहण नइ होही त पूरा छत्तीसगढ़िया मन करेजा ल बढ़ ठेस पहुँचही।

छत्तीसगढ़ के राजनीति म वोट मांगे के भासा छत्तीसगढ़ी हवय फेर राज काज के पारी आथे त ऐखर बर कई ठन बहाना बना के नियम बता के छत्तीसगढ़ी भासा ल तिरिया देथे अइसने करत करत कई बछर बीत गे तभो ले छत्तीसगढ़ के राज काज म छत्तीसगढ़ी भासा ह अपन जगह नइ बना सकीस, अवइया बेरा म एहि विचारधारा ल बदले के बेरा हवय।

राज्य म बने नवा सरकार ले छत्तीसगढ़ के मनखे मन ल नवा उम्मीद हवय के नवा सरकार ह छत्तीसगढ़ के हित बर बुता करही, अउ ऐखर सुरुवात मुख्यमंत्री, कैबिनेट मंत्री, विधायक, मन के छत्तीसगढ़ी भासा म शपत ले के बाद सुरु होही जेला पूरा देश देखही के छत्तीसगढ़ राज्य के मुख्यमंत्री अपन सपथ ग्रहण सम्हारो म कोन से भासा के उपयोग करही।