दारू म बूड़े मनखे
दारू म बूड़े अदलहा मनखे…!!
नस म घुरे दारू मतौना दउड़त हे टेड़ुवावत हे…!
दारू म बूड़े अदलहा मनखे जम्मो ल हुरियावत हे…!!
लहु म कहाँ सरम अउ पानी
बाँचिस नहीं जवानी
नींद हजागे जांगर सिरा गे
घिसलत हे जिनगानी
माई कड़ेरी म घुना लगे हे भिथिया घलो बोजावत हे…!
दारू म बूड़े अदलहा मनखे जम्मो ल हुरियावत हे…!!
दारू बिना अंगठी सब काँपै
गोड़ घलो थरथरावै
मुँह म मौनी बाबा समावै
बुद्धि ल लकवा मारै
मुर्छित देह ल टुकुर-टुकुर कर आँखी भर है जियावत हे…!
दारू म बूड़े अदलहा मनखे जम्मो ल हुरियावत हे…!!
कइसन जुग आय कइसन जमाना
सराफत खोजे नई मिलै
तलाव तलाव म कचरा फेंकावै
खोखमा कमल नई खिलै
घर के हिम्मत बुता छोड़ के पी-पी के बोमियावत हे…!
दारू म बूड़े अदलहा मनखे जम्मो ल हुरियावत हे…!!
कलजुग के तीरथ सब भट्ठी
दारू भगत ठुढ़ियावैं
होस के जात ले पइसा सिरात ले
दारू म चोला बुड़ावै
कहाँ सुआरी कहाँ के लइका सब के भविष बोहावत हे…!
दारू म बूड़े अदलहा मनखे जम्मो ल हुरियावत हे…!!
जोहन भार्गव
सेंदरी बिलासपुर
0 Comments
अपने विचार सुझाव यहाँ लिख कर हमें भेजें।