पाके अरमपपाई कस, छत्तीसगढ़ी कविता रचनाकार जोहन भार्गव जी सेंदरी बिलासपुर (छत्तीसगढ़)

 

पाके अरमपपाई कस…!!

पाके अरमपपाई कस मिठाथे अबड़  जवानी ओ …!

अँचरा म गठिया के धर ले गुरतुर प्रेम के बानी ओ…!!

हवा झुलावै फूल कली ल महक साँस म घोरै नसा

काया छोड़ के जावै बचपन देके तन म मादकता

चंदा ल चकोर निहारै आँखी ह निंदिया रानी ओ…!

अँचरा म गठिया के धर ले गुरतुर प्रेम के बानी ओ…!!

सावन के भावन मौसम तैं जाड़ के रात रजाई अस

पलपला आँच म चूरे अंँउटे निमगा दूध मलाई अस

उज्जर मुंँह के ललहूँ ओंठ ताजा संतरा के चानी ओ…!

अँचरा म गठिया के धर ले गुरतुर प्रेम के बानी ओ…!!

जीव रूख धरती के ऊंँकरो फूले फरे के समै रथे

समै आए म भौंरा फूल के रस पिए म रमे रथे

बिजली चमकै बादर बरसै गिरै समै म पानी ओ…!!

अँचरा म गठिया के धर ले गुरतुर प्रेम के बानी ओ…!!

 जोहन भार्गव सेंदरी 

बिलासपुर (छत्तीसगढ़) 

७९७४०२५९८५