खाएन-कमाएन अउ सुतेन हम आठों पहर रचना- जोहन भार्गव जी सेंदरी बिलासपुर छत्तीसगढ़

 

का ए नवा बछर…??

खाएन-कमाएन अउ सुतेन हम आठों पहर…!

सब दिन एक बरोबर का ए नवा बछर…??

जांगर चलत ले सिरावै नहीं बुता कोनो के

भात-बासी म अघाई रहै आवक जम्मो के

थोरकिन थिरा लौ सुरता लौ पी लौ पानी पसर भर…!

सब दिन एक बरोबर का ए नवा बछर…??

खेत-खलिहान हमर उजड़गे सहरीकरन म

कारखाना के भेंट चढ़गे जड़ी-बूटी जीव वन म

घर घुरुवा कोठी कोठार नईं आही नजर…!

सब दिन एक बरोबर का ए नवा बछर…??

निच्चट गरीब बड़ अभागा होगे भविस के रद्दा

नव जुग म जंगल बनगे हीरा सोना‌ के अड्डा

रूख-राई म चलै आरी जीव काँपत हें थर-थर…!

सब दिन एक बरोबर का ए नवा बछर…??

नवा बछर के नवा सोंच ल तियागा संगवारी

जुर-मिल के आवा सम्हाली जंगल खेत बारी

लीलत हवै मसीन मनुस के बगइचा कुआँ घर…!

सब दिन एक बरोबर का ए नवा बछर…!!

रचना- जोहन भार्गव जी 

     सेंदरी बिलासपुर ७९७४०२५९८५