हसदेव जाए से रोके बर जगह-जगह बेरिकेट लगाइस प्रशासन तेखर बाद भी हजारो सेनानी पंहुचीस हसदेव जंगल के लड़ाई म सामिल होये बर-

 

जोहार छत्तीसगढ़ पार्टी के सेनानी  मन ल रोके बर बेरिकेट लगाइन, गिरफ्तार करीन, रइपुर ले कटघोरा तक पुलिस चेकिंग होइस तेखर बाद भी धरना स्थल पहुंचे ले नइ रोक सकीस प्रशासन-

10 जिला के पुलिस अपन पूरा ताकत झोंक के बाद भी छत्तीसगढ़िया क्रान्ति सेना अउ जोहार छत्तीसगढ़ पार्टी के सेनानी मन ला हसदेव पहुचे से रोक नई पाईस।

अनिल कुमार पाली। कोरबा

जोहार छत्तीसगढ़ पार्टी के कोती ले हसदेव अरण्य के कटत जंगल ल बचाये बर अउ खदान के रूप म अडाणी कंपनी ल दिए ठेका ल रदद करे बर 07 जनवरी के हसदेव जंगल जाए बर निकले सेनानी मन ल पुलिस प्रशासन ह जगह-जगह बेरिकेट लगा के रोके के पूरा प्रयास करिस, छत्तीसगढ़िया क्रांति सेना के कुछ एक सेनानी मन ल बिहनिया ले गिरफ्तार कर के बिहान ले सांझ तक थाना म बईठा के रखीन तेखर बाद भी हजारों सेनानी प्रदेश के पुलिस ल चकमा दे के धरना स्थल पंहुचे म सफल होंगे, देखते देखत धरना स्थल के कुछ दूरी म हजारो के भीड़ इकट्ठा होंगे जेन मन हसदेव बचाओ अडाणी वापस जाओ के नारा देवत आघु बढत रहिस, जोहार छत्तीसगढ़ पार्टी के सेनानी मन के संख्या ल देख के प्रशासन के घलोक पसीना छूट गे फेर आघु बढ़त काफिला ल देख के पुलिस प्रशासन ह धरना स्थल जाए ले रोके के हिम्मत नइ कर पइस अउ सांझ होये के पहली हजारों के भीड़ के रूप म जोहार छत्तीसगढ़ पार्टी अउ छत्तीसगढ़िया क्रांति सेना के पदाधिकारी सेनानी मन धरना स्थल म पहुंच के आंदोलन करत ग्रामीण मन के सहयोग करीन।

हसदेव बचाये बर जावत छत्तीसगढ़िया युवा क्रांति सेना के प्रदेश महामंत्री ल पुलिस करिस गिरफ्तार- |

आंदोलन म बइठे ग्रामीण मन ल चाउर-दार के सहयोग करिस जोहार छत्तीसगढ़ पार्टी ह

जंगल कटाई के विरोध करत धरना स्थल म पूरा परिवार के संग बइठे ग्रामीण मन ल चाउर, दार भेंट कर के हसदेव जंगल ल बचाये के आंदोलन ल पूरा संग दे के गोठ करिस जोहार छत्तीसगढ़ पार्टी के प्रदेश अध्यक्ष अमित बघेल ह, ऐखर ले पहली इही हसदेव जंगल ले ही हसदेव जंगल ल काटे के विरोध करत छः महीना के जेल गे रहिस हे पार्टी अध्यक्ष अमित बघेल ह।

जोहार छत्तीसगढ़ पार्टी के प्रदेश अध्यक्ष अमित बघेल ह कहिस के दुनो राष्ट्रीय पार्टी मन मिल के छत्तीसगढ़ के जनता ल लूटत हे, जब कांग्रेस के सरकार रहिस हे त एहि कांग्रेस के नेता मन बिजली के जरूरत ल पूरा करे बर जंगल के कटाई जरूरी हे कहे, अउ भाजपा विपक्ष म रही के चुपे बइठे रहिस हे, अब जब भाजपा के सरकार हे त एहि कांग्रेस के मन भाजपा के विरोध कर के छत्तीसगढ़िया मन ल छले के बुता करत हे अउ जेखर सरकार हवय तेन पार्टी वाले मन मुँह म लाडू गूंज के चुप बइठे हे, दुनो राष्ट्रीय पार्टी मन अंदर-अंदर एक दूसर के सहयोग करतथे अउ जनता ल दिखाये बर विरोध।