छत्तीसगढ़ी कविता- बन‌ जा मया के अंजरी, कवि जोहन भार्गव जी।

 

बन‌ जा मया के अंजरी

मैं तोर बिन भाँठा‌ के मछरी आ मोला पानी पीया दे…!

बन जा मया के अंजरी आ मोला पानी पीया दे…!!

मैं हर पियासा मरुस्थल तयँ प्रेम के ऊँचा हिमालय

तोर मन मया के ओगरा मोर हिरदय सुन्ना सिवालय

मोर बर तयँ जल-थल बदरी आ मोला पानी पीया दे…!

बन जा मया के अंजरी आ मोला पानी पीया दे…!!

मेला ठेला न बजार हाट न ठाठ-बाट फेसन भावय

न संगी साथी सुहावयँ बस तोरेच सुरता आवय

तोर अंग-अंग कलसा गगरी आ मोला पानी पीया दे…!

बन जा मया के अंजरी आ मोला पानी पीया दे…!!

मयँ बीस बछर के पियासा तोला देख के जागय आसा

हम जनम-जनम के जोड़ी एहू जनम मिलय झन निरासा

मोर दाना-पानी दोना-पतरी दाना-पानी खवा पीया दे…!

बन जा मया के अंजरी आ मोला पानी पीया दे…!!

कवि- जोहन भार्गव जी

सेंदरी बिलासपुर (छत्तीसगढ़)