होली गीत कइसन जुग सदी कइसे जमाना…! होली के संग प्रहलाद ल जलाना जोहन भार्गव सेंदरी बिलासपुर (छत्तीसगढ़)

 होली गीत 

प्रहलाद ल जलाना…!!

कइसन जुग सदी कइसे जमाना…!  

होली के संग प्रहलाद ल जलाना…!!

आनी-बानी के नसा म भुला गे

हर मनखे बिधुन हे मता गे 

दाई-ददा के घलो नईं हे ठिकाना…!

होली के संग प्रहलाद ल जलाना…!!

गुटका बीड़ी-सिगरेट के आदी

गंजहा भंगेड़ी घरो-घर शराबी 

तीजा-तिहार के रौनक मेटाना…!

होली के संग प्रहलाद ल जलाना…!!

तन-मन धन होली संग भुंजाथे 

लहू म घुर के मतौना बोहाथे 

सुख-सौभाग म आगी लगाना…!

होली के संग प्रहलाद ल जलाना…!!

अफसर चपरासी घुसखहा

सत्ता शासक प्रजा‌ अदलहा

धरम करम लाज सरम भुलाना…!

होली के संग प्रहलाद ल जलाना…!!

मन म कपट छल रिस्ता टूटत हे

भाई के हाँथ ले भाई छूटत हे

धन के दाँव म सब कुछ गँवाना…!

होली के संग प्रहलाद ल जलाना…!!

 जोहन भार्गव सेंदरी बिलासपुर (छत्तीसगढ़)