चुनाव तिहार आथे त जगह-जगह छत्तीसगढ़ी म गोठ होथे, चुनाव के बाद छत्तीसगढ़ी भासा अउ छत्तीसगढ़िया मन ल पूछे नइ-

 व्यंग रचना मंत्री जी के लड़भर बोल

चुनाव तिहार आथे त जगह-जगह छत्तीसगढ़ी म गोठ होथे, चुनाव के बाद छत्तीसगढ़ी भासा अउ छत्तीसगढ़िया मन ल पूछे नइ- 

छत्तीसगढ़ म देखे ल मिलथे के चुनाव तीर म आथे त नेता मंत्री मन निमगा छत्तीसगढ़िया हो जथे, जिन्हा जाथे उन्हा छत्तीसगढ़ी म गोठियाथे, छत्तीसगढ़ी भासा म अपन भासन देथे, अउ जइसने मंच ले उतरथे त छत्तीसगढ़ी के संग हिंदी ल रपोट देथे, सुनईया मनखे मन घलोक मंत्री जी के गोठ सुन के अचंभित हो जथे।

विज्ञापन के लिए संपर्क करें, whatsap No:- 7722 906664,  E-mail-aarugnews@gmail.com

तब मंत्री जी ले पूछे म बताथे के हमर छत्तीसगढ़ प्रदेश म वोट डराइया मनखे मन सबो छत्तीसगढ़िया हवय, उहि मन तो हमनला चुनाव म  वोट दे के नेता-मंत्री बनाथे त बेचारा मन बर छत्तीसगढ़ी म गोठियाय ल लगथे, वोट मांगे के बेरा हिंदी/अंग्रेजी म गोठियाबो त हमर प्रदेश के मनखे मन वइसने भासा ल समझी नइ त हमनला वोट कइसे देही, ऐखर बर चुनाव के बेरा म छत्तीसगढ़ी म गोठियाय ल लगथे।

फेर मंत्री जी कहिथे- चुनाव होये के बाद कोनो ल भासन सुनाये ले का मतलब हिंदी म गोठिया के छत्तीसगढ़ी म गोठिया कोनो बोलने वाला नइ रहें, अउ  मंत्री बने के बाद पूरा प्रदेश के देश के सम्मान करें ल लगथे, हमना सुनने वाला पूरा देश के मनखे मन होथे छत्तीसगढ़ी म गोठियाबो त दूसर प्रदेश के मन कइसे हमर गोठ ल समझी, दूसर प्रदेश के बयपारी मन हमर प्रदेश म कइसे अपन पइसा ल बयपार म लगाही, हमर राज्य के बिकास बर सबो भासा जरूरी हवय, सिरफ छत्तीसगढ़ी भासा म का होही, छत्तीसगढ़ के बिकास बर सबो भासा जरूरी हे, छत्तीसगढ़ी म गोठिया के अपन प्रदेश के मनखे मन ल देहाती थोड़ी बनाना हे।

विज्ञापन के लिए संपर्क करें, whatsap No:- 7722 906664,  E-mail-aarugnews@gmail.com

फेर मंत्री जी जेन मनखे मन आप के छत्तीसगढ़ी भासन, छत्तीसगढ़ी गोठ सुन के आप ल चुनाव म वोट दे हे तिखर का होही-

त मंत्री जी कहिथे -  अपन प्रदेश के मनखे मन के हमन सम्मान करथन, अपन प्रदेश के मनखे मन ल निःशुल्क चाउर देवत हन, निःशुल्क सरकारी अस्पताल म इलाज के सुविधा देवत हन, कई ठन योजना म पइसा देवत हन, कई किसिम के दारू देवत हन त अउ कइसे कर डरबो अपन सारा पूंजी थोड़ी दे देबो, उंखर एक वोट ले का होथे उंखर एक वोट ले थोड़ी चुनाव जीते हौ मैं, मैं तो पूरा प्रदेश के मनखे के भासा के संस्करीति के सम्मान करथव, जेन मन छत्तीसगढ़ म एक ठन भासा के संस्करीति के गोठ करथे तेन मन छोटे मानसिकता के होथे, हमन वइसने टाइप के मनखे नइ हन नाही हमर पार्टी वइसने विचारधारा राखथे हमन तो सबो ल संग म लेके चलथन।

त मंत्री जी आप मन कहेव मनखे मन ल अच्छा किसिम के दारू देवत हन त दारू ले तो कतका घर बिगड़त हे त दारू ल काबर बंद नइ करव-

त नेता जी कहिथे- अरे जोजव तोला कुछु नइ मालूम हे, कोन कहिस के घर बिगड़त हे, तै देखत नइ हस कतका घर के लईका मन दारू भट्टी म बुता कर के अपन घर चलावत हे, दारू के सीसी बिन-बिन के बरफ के गोला खावत हे, अउ दारू ल बंद कर देबो त फलाना वंदन योजना, ढेंकाना संगवारी योजना के पइसा ल कहाँ ले देबे योजना के पइसा ल दे बर मोर घर के ब्यारा ल थोड़ी बेच दुहुँ, ऐखर बर कहिथव थोड़किन पढ़ ले रहिथे त तोला अर्थशास्त्र समझ आ जतीस के सरकार कइसे चलाना रहिथे।

विज्ञापन के लिए संपर्क करें, whatsap No:- 7722 906664,  E-mail-aarugnews@gmail.com

 मंत्री जी मैं ह तो पूरा पढ़ डरे हौ स्नातक डिग्री, बीएड, एम ए, अउ कतना कन डिग्री धरेंव हो, तेखर बाद भी बेरोजगार घुमत हो-

 त आप मन  बतावव आप मन कतका पढ़े हौ- अरे मैं ह मोला का पुछबे रे मैं ह तो अतना पढ़े हौ के सरकार चलावत हो, तोला बताए के जरूरत नइ हे समझे, वइसने नेता जी जेन बेरा म आप मन चुनाव लड़े रहो तेन बेरा आप के आवेदन फॉर्म म तो पांचवी पास लिखाये रहिस हे का ये सही हे, नइ रे ये सब सही नइ हे, तोर होंगे चल जा इंहा ले का-का पूछत रहिथस, अउ जा चुनाव के तइयारी कर ये बेरा अउ जादा वोट ले जितना हे मोला, चुनाव म पइसा अउ दारू बोहा देबे तन्हा देखथन कोन रोकथे हमला जीते ले।

युवा कवि साहित्यकार

अनिल कुमार पाली

तारबाहर बिलासपुर