छत्तीसगढ़ी फ़िल्म जोहार छत्तीसगढ़

जोहार छत्तीसगढ़, छत्तीसगढ़िया क्रांति सेना

फ़िल्म समीक्षा

छत्तीसगढ़ी पिक्चर "जोहार छत्तीसगढ़"

                   

 

हमर छत्तीसगढ़ राज बने के बाद छत्तीसगढ़ म धीरे-धीरे छत्तीसगढ़ी पिक्चर के विकास होइस, जेमा छत्तीसगढ़ी भासा म बने फ़िल्म "मोर छइंया भुइँया" ह  
छत्तीसगढ़िया मनखे मन के करेजा म बस गे, फ़िल्म के येक-येक पात्र ह अइसे लगीस जइसे छत्तीसगढ़िया मनखे के अपने कहानी हे, जेमा किसान ह अपन खेती किसानी ल छोड़ के कमाये खाये ल दूसर राज जा के उंहा काम बुता करें, मजदूरी करें, अउ कुछु नई मिले त दूसर मनखे के घर म बुता करें, फ़िल्म जइसे चलीस सब्बो छत्तीसगढ़िया मनखे मन के, फ़िल्म बनईया मनखे मन के, सब्बो के हौसला बढ़ गे अउ छत्तीसगढ़ म छत्तीसगढ़ी फ़िल्म के ढेर लग गे, फेर तभो ले छत्तीसगढ़ी फ़िल्म म छत्तीसगढ़िया वाद के कमी देखे बर मिले काबर के छत्तीसगढ़िया मनखे के पीरा, छत्तीसगढ़ी भासा के पीरा ल कोनो नइ देखाइस, नवा राज बने के बाद छत्तीसगढ़ी भासा छत्तीसगढ़िया वाद ह आधु नइ अपाइस, तभे छत्तीसगढ़ म नवा सुरूज ले के छत्तीसगढ़िया के मान सम्मान ल जगाये बर, छत्तीसगढ़िया के अस्मिता ल जगाये बर छत्तीसगढ़ी बोली भाखा, संस्करीति, तीज- तिहार ल बगराये बर, छत्तीसगढ़ महतारी के मया दुलार ले भरे छत्तीसगढ़ी फ़िल्म *"जोहार छत्तीसगढ़"* ल भईया- राज साहू निर्माता अउ निर्देशक भईया - देवेंद्र जांगड़े ह बनाये हे, जेमा शोषण के शिकार होवत छत्तीसगढ़िया मनखे ल जगाये के पूरा प्रयास करें गे हे, अइसने फ़िल्म ह छत्तीसगढ़ म हमेशा बनना चाही, जेखर ले छत्तीसगढ़ के लईका मन ल अपन हक संस्करीति ल जाने के समझे के अवसर मिलही। अउ फ़िल्म के सब्बो किरदार ल देख के आप मन ल पता चल जाही की छत्तीसगढ़ म जोहार छत्तीसगढ़ जइसे फ़िल्म के कतका अगोरा रहिस हे, अउ येही फ़िल्म ल छत्तीसगढ़ म येक नवा रिकॉड घलोक कायम करही, काबर के अइसे फ़िल्म जेमा मनखे ह खुद अपने आप ल देखे अउ जीये हे तेन ल सब्बो पसंद करथे, तेखरे सेती जोहार छत्तीसगढ़ फ़िल्म मनोरंजन के संगे-संग स्वाभिमान अउ आत्म सम्मान के फ़िल्म हे, जेला सब्बो छत्तीसगढ़िया ल जा के येक बार जरूर देखना चाही, देखे के बाद खुद ब खुद फ़िल्म के तारीफ करे बर अपन आप ल नइ रोक पाहु। अउ ये जोहार छत्तीसगढ़ फ़िल्म ल देखे के बाद जेन मनखे के हौसला नइ बाढ़िस, लहू म उबाल नइ आइस समझ लेहु फेर वो मनखे ह छत्तीसगढ़िया नइ रहिगे हे।

जोहार छत्तीसगढ़, जय छत्तीसगढ़ महतारी 

युवा कवि साहित्यकार
अनिल कुमार पाली, तारबाहर बिलासपुर छत्तीसगढ़
जिला उपाध्यक्ष- छत्तीसगढ़िया क्रांति सेना बिलासपुर
मो.न:-7722906664, 7987766416
ईमेल:- anilpali635@gmail.com