होली म फागुन के रंग बसंती आगे

कविता 

ममहावत अमरईया देख बसंत छागे 

फागुन के फाग खेले रंग बसंती आगे 

लाली फूले परसा ह दुरिया ल चिनहात हे 

पियर रंग सरसो फूले देख गहू बऊरात हे

रुख राई डारा पाना अपन रंग म हरियागे 

फागुन के फाग खेले रंग बसंती आगे 

घम घम ल मौउरे आमा सेम्हर फूल इतरात हे 

कुहकी मारे कारी कोयली जीव ल जलाथ हे 

गुन गुनावत हे भौरा संग देख बसंत मतागे 

फागुन के फाग खेले रंग बसंती आगे 

पडकी परेवना सबो फागुन गीत गात हे 

सुवा मैना बैठ अमरईया मन ल मिलात हे 

आनी बानी के रंग गुलाल बनके बसंत आगे 

फागुन के फाग खेले रंग बसंती आगे 

ममहावत अमरईया देख बसंत छागे

आप अऊ आपके सबो झन परिवार ल मोर तरफ ल होली के गाड़ा गाड़ा बधाई अऊ शुभकामना 

    

 रचनाकार -  अनिल जाॅगडे 

 संकुल हिन्छापुरी (सरगाव ) पथरिया