क्षेत्रीय पार्टी काबर जरूरी..?
 |
| अनिल कुमार पाली |
छत्तीसगढ़ चुनाव के दिन लकठात हे त प्रत्यासी मन के धड़कन अउ लोगन मन के दिलचस्पी घलो बाढ़त हे। कई राजनीतिक पंडित मन के मानना घलो हे कि ये विधानसभा चुनाव (जेमे 5 राज्य शामिल हे) लोकसभा चुनाव के सेमीफाइनल हो सकत हे। काबर ये राज्य मन के परिणाम आगामी चुनाव बर पार्टी मन के स्थिति स्पष्ट करहि। अइसन म हमर छत्तीसगढ़ के गोठ घलो जरूरी हे। मौजूदा हालात म छत्तीसगढ़ म भारी खिंचतान घलो चलत हे, चाहे प्रत्यासी घोषणा बर असमंजस होय चाहे कुछ जगह मन म घोषित प्रत्यासी बदले के मुद्दा होय, चाहे बाहरी प्रत्यासी के मुद्दा होय अभी गरमाए हे।
ये बछर के विधानसभा चुनाव म एक बड़का परिवर्तन जेन देखे बर मिलत हे वो हरे क्षेत्रीय पार्टी मन के चुनाव म उतरना, येखर ले पहिली घलो छोटे संगठन या पार्टी मन चुनाव म उतरे रिहिस फेर ये बछर के अलग ही वातावरण हे। वाकई म जमीन ले जुड़े मुद्दा के गोठ बात अउ राज्य के हित म काम बुता बर क्षेत्रीय पार्टी के भूमिका जरूरी हे। आज बहुत अकन राज्य हे जिंहा क्षेत्रीय पार्टी राज करत हे, अउ अपन राज्य के जनता के हिसाब ले राज्य अउ जनता के विकास घलो करत हे। छत्तीसगढ़ म घलो ये बार छत्तीसगढ़िया अउ बाहरी या क्षेत्रीय अउ राष्ट्रीय पार्टी के मुकाबला देखे ला मिलहि। छत्तीसगढ़ बने के बाद ले दु पार्टी हर राज करिस फेर ये दारी अलग माहौल दिखत हे।
क्षेत्रीय पार्टी या संगठन म जनता कांग्रेस (जोगी), गोंडवाना गणतंत्र पार्टी, छत्तीसगढ़िया क्रांति सेना(जोहार छत्तीसगढ़ पार्टी), सर्व आदिवासी समाज (हमर राज पार्टी) येखर अलावा आप, बीएसपी, सीपीआई अउ अलग अलग एरिया हिसाब ले बहुत अकन छोटे पार्टी या संगठन मन चुनाव लड़े के बात करत हे। क्षेत्रीय पार्टी मन अपन अपन हिसाब ले जमीनी स्तर म बुता करे के दावा करत हे, जरूरी भी हाबे काबर अभी तक सत्ता म तो राष्ट्रीय पार्टी ही आये अउ गये हे अइसे म क्षेत्रीय पार्टी मन ल सत्ता के काम ल जनता नइ देख पाये हे। जमीनी स्तर म भले क्षेत्रीय संगठन मन के बुता समय समय म दिखथे।
अभी तक राज्य म जनता कांग्रेस (जोगी) अउ बीएसपी अपन परंपरागत सीट मन म विधायक बनाये म कामयाब होय हे। वहीं आप पार्टी घलो बड़का पार्टी मन ल टक्कर देय बर कमर कसे हे। छत्तीसगढ़िया क्रांति सेना (अब जोहार छत्तीसगढ़ पार्टी) के बात आय त माटी ले जुड़े लोगन मन के अस्मिता बचाये बर जोर देथे, जेमे तीज तिहार अउ पुरातन संस्कृति बचाये अउ हक अधिकार बर निरंतर लड़ाई लड़े के बात हे। अपन राज म छत्तीसगढिय़ावाद स्थापित करना मूल उद्देश्य लेके चलत हे। गोंडवाना गणतंत्र पार्टी के बात आय नाम से भले जाति विशेष जइसे कि राज्य के बड़का जनजाति समूह गोंड़ समूह के नाव म पार्टी के नाव हे, फेर दावा करथे कि जम्मों छत्तीसगढ़िया अउ स्थानीय निवासी मन के हित बर बुता करने वाला पार्टी आय। जेन मध्यप्रदेश म ज्यादा सक्रिय घलो हे। सर्व आदिवासी समाज जेन अब हमर राज पार्टी होगे पूरा छत्तीसगढ़ म सक्रिय दिखथे काबर छत्तीसगढ़ आदिवासी बाहुल्य राज्य घलो हरे, फेर बस्तर म ज्यादा ही सक्रिय दिखथे भानुप्रतापपुर उपचुनाव के बाद ये पार्टी अउ ज्यादा चर्चा में आ गे रिहिस, येमन घलो जल जंगल जमीन के लड़ाई के साथ छत्तीसगढ़ के मूलनिवासी मन के राज स्थापित करे के बात करथे। सीपीआई जेन बस्तर म ही प्रत्यासी उतारे के बात करथे अउ जमीनी हक अधिकार के बात करथे। येखर अलावा अउ बहुत अकन छोटे संगठन मन चुनाव म उतर सकत हे।
प्रदेश म नवा क्षेत्रीय पार्टी "जोहार छत्तीसगढ़ पार्टी के उदय, जारी होइस प्रत्याशी मन के सूचि-
कुल मिलाके क्षेत्रीय पार्टी मन के मूल उद्देश्य देखथन त एक बात दिखथे सबके मकसद क्षेत्रीयतावाद या छत्तीसगढ़ियावाद स्थापित करके राज्य अउ जनता के विकास करना दिखथे।
अइसन म बड़का पार्टी मन के विरुद्ध क्षेत्रीय पार्टी एक होके (गठबंधन) लड़ाई करतिस त ज्यादा बेहतर रिहिस। छोटे पार्टी मन के गठबंधन होय म परिणाम कुछ अलगे दिखतिस..!
खैर समय के साथ पता लग जाहि कोन काकर ऊपर भारी पड़हि, फेर क्षेत्रीय पार्टी के जरूरत अउ लोगन मन के क्षेत्रीय पार्टी के उत्थान बर सोच ये दारी के चुनाव के बाद स्पष्ट जरूरी हो जाहि।
अमित नेताम
गरियाबंद (छ.ग.)
0 Comments
अपने विचार सुझाव यहाँ लिख कर हमें भेजें।