ऐ संगी वतन के खातिर जउन मन दीन हें कुरबानी, कवि-जोहन भार्गव जी सेंदरी

 ऐ संगी वतन के खातिर…!!

ऐ संगी वतन के खातिर जउन मन दीन हें कुरबानी…!

कम से कम दिन म एक पइत सुरता करी ऊँकर कहानी…!!

छत्तीसगढ़ के बीर नारायण पहिली क्रांतिकारी 

जेकर नाँव सुने म काँपयँ लाली चाँटी दुराचारी 

अट्ठारह सौ संतावन म छूट गे दाना-पानी…!

कम से कम दिन म एक पइत सुरता करी ऊँकर कहानी…!!

जब भारत महतारी पिंजरा म कलपय रोवय

तब दाई के सरवन बेटा बेटी मन आँसू पोंछयँ

अंगरेज मटाना मन ल मेटे म खपाइन जवानी…!

कम से कम दिन म एक पइत सुरता करी ऊँकर कहानी…!!

पंडित सुंदरलाल शर्मा छत्तीसगढ़ कहिथे गांधी 

सिंचाई कर के विरोध म छेड़िस आंदोलन के आंधी 

विद्वान कवि गुनी लेखक नहीं कोई दूसर सानी…!

कम से कम दिन म एक पइत सुरता करी ऊँकर कहानी…!!

बाबू छोटेलाल श्रीवास्तव खादी स्वदेशी प्रचारक 

जंगल सत्याग्रह म इन सहयोगी किसान के नायक 

भारत छोड़ो आंदोलन म घलो छोड़िन निशानी…!

कम से कम दिन म एक पइत सुरता करी ऊँकर कहानी…!!

ठाकुर छेदीलाल बैरिस्टर बिलासपुर जिला के वासी

लंदन म इंडिया हाउस के नाँव के संघ बना दिस 

बम निरमान के ट्रेनिंग लीन फ्रांस म हिंदुस्तानी…!

कम से कम दिन म एक पइत सुरता करी ऊँकर कहानी…!!

कवि- जोहन भार्गव जी

सेंदरी बिलासपुर छत्तीसगढ़