कत्तेक दुख ल सहि के जीयत हाववँ…! गोरसी कस आँच म सेंकावत हाववँ, कवि- जोहन भार्गव जी

 

रोज सेंकावत हाववँ

कत्तेक दुख ल सहि के जीयत हाववँ…!

गोरसी कस आँच म सेंकावत हाववँ…!

बचपन म दाई-ददा ले दूरिहा होगेवँ

भउजी-भइया के मूड़ के मैं बोझा होगेवँ

दू पथरा के पाट म चिक्कन पिसाववँ…!

गोरसी कस आँच म सेंकावत हाववँ…!!

ले-दे के मोर गियारवीं तक पड़हाई

उमर भर भइया-भउजी दूनों के ठेंसाई

निरपराध हौं त भो ले तड़पत हाववँ…!

गोरसी कस आँच म सेंकावत हाववँ…!!

आई-टी-आई के टेरनिंग ददा कराइस

निचट गरीबिन दसा म घलो पड़हाइस

दाई-ददा के दम म पनपत हाववँ…!

गोरसी आँच म रोज सेंकावत हाववँ…!!

भउजी करिया डोमी बनके फूसनथे

कच्चा सूरन कांदा असन उसनथे

बिहि पत्ती कुरमा संग डबकत हाववँ…!

गोरसी कस आँच म सेंकावत हाववँ…!!

दया के मार ह हाड़ा तक जनाथे

पीरा लहू के संगे-संग बोहाथे

आँसू सुखागे त भो ले रोवत हाववँ…!

गोरसी कस आँच म सेंकावत  हाववँ…!!

कवि- जोहन भार्गव जी

सेंदरी बिलासपुर छत्तीसगढ़