छत्तीसगढ़ी कविता- मैं अंगना के चौंरा...कवि जोहन भार्गव जी।

 

मैं एक अंगना के चौंरा…!

गोंदा फूल के पंखुड़ी तोर ताजा-ताजा मुखड़ा…!

मैं सम्मोहित बिधुन बड़ा मैं गुन-गुन गुन-गुन भँवरा…!!

एक परिवार के मरियादा हवँ एक परिवार के धुरा…!

दाई-ददा के दुलौरिन मैं एक अंगना के चौंरा…!!

बाग-बाग म डाल-डाल म मंडराना तोर बूता

एक बागीचा एक थाँव के मैं शोभा सुंदरता

तयँ सँवरा कई साँप पोंसइया तोर का भरोसा लबरा…!

दाई-ददा के दुलौरिन मैं एक अंगना के चौंरा…!!

किरिया खा के कहत हौं सजनी मान ले मोर कहना

प्रेम के पक्का घर म रखिहौं मया के देहूँ गहना

साँप पोंसइया झन लबरा कहि लगन हावय गहरा…!

मैं सम्मोहित बिधुन बड़ा मैं गुन-गुन गुन-गुन भँवरा…!!

निश्छल प्रेम के सदी पहागे कलजुग के ये जमाना

काम निकाले बर मनखे के कई ठन गोठ बहाना

कुल कुटुम्ब जन-नता समाज मोर मयारूक पहरा…!

दाई-ददा के दुलौरिन मैं एक अंगना के चौंरा…!!

कवि- जोहन भार्गव जी

सेंदरी बिलासपुर (छत्तीसगढ़)