होली गीत,घेरी-बेरी पोता मुँह गाल पोता-कवि- जोहन भार्गव जी सेंदरी बिलासपुर

 

                           (होली गीत) 

           घेरी-बेरी पोता!!

घेरी-बेरी पोता मुँह गाल पोता…!

अंग-अंग रंग अऊ गुलाल पोता…!!

पाँच छेना ले के पहिली भेंट करब जाय

काम क्रोध लोभ अहंकार जरि जाय

दोष अवगुन होली म हो रीता…!

अंग-अंग रंग अउ गुलाल पोता…!!

बरती दीया के अंजोर सबके घर

रहय अंधियार कहूँ न कोनो के डर

तन-मन धन ले रहव सुभित्ता…!

अंग-अंग रंग अउ गुलाल पोता…!!

दिल मिले चाही जो रपोटे के हे साध

दुख-सुख म घलो धरव अंगठी हाथ

होली के तिहार झन रहय फीक्का…!

अंग-अंग रंग अउ गुलाल पोता…!!

जोहन करय विनती सुनव संगी

नसा करव न काम लंदी-फंदी

पी के एती-तेती न गिरा न सूता…!

अंग-अंग रंग अउ गुलाल पोता…!!

कवि- जोहन भार्गव जी

सेंदरी बिलासपुर (छत्तीसगढ़)