खैरागढ़ छुईखदान गंडई जिला के रहस्यमय मँडीप खोल गुफा, आलेख-हेमंत मसखरे (मनचल्हा )

 रहस्यमय मँडीप खोल गुफा.... खैरागढ़ छुईखदान गंडई -

ये गुफा आय छतीसगढ़ राज्य के खैरागढ़ छुईखदान गंडई जिला के तहसील छुईखदान के ग्राम पंचयात ठाकुरटोला गाँव के तीर म डोंगरी भीतर गुफा हवै जेखर नाँव हे मंडीपखोल गुफा। ये गुफा एशिया महादीप के सबले बड़े गुफा मे दूसरा नंबर मे गिनती आथे।ये गुफा एक बछर म एक बेर खुलथे। गुफा खुले के पहिली ठाकुरटोला के राजा ह गुफा के साफ सफई अउ गुफा तीर म फटाका तको फोड़थे काबर की ये गुफा म कतको ख़तरनाक जीव के निवास स्थान भी माने जाथे। ये गुफा हर बछर अक्षय तृतीय जेन ल हमन अक्ति तिहार घलो किथन। इही आक्ति तिहार के पहिली सोमवार के खुलथे। ये गुफा मे ठाकुरटोला के राजा ह गुफा मे जाके सबले पहिली शिवलिंग के पूजा पाठ करके, अपने ह दरवाजा ल खोलथे।ये गुफा मे जाये खातीर एके ठक नदियाँ ल 16बेर ले पार करे ल लगथे।ये गुफा ल देखे खातीर बड़ दूरिहा दूरिहा ले दर्शक अउ श्रद्धालु मन आथे।बाहिर म कतको घाम अउ ताप राहे फेर ये गुफा के भीतरी म अब्बड़ ठंडा वातावरण रथे। ये गुफा के अंदर जाये बर एक ठक दरवाजा हे फेर उहूँ ल नानकून हे जेमे मुश्किल ले एके दोनो झन संघरा जात बनथे। गुफा के भीतरी म कुलुप अँधियार रहिथे। ये गुफा म कोनो टॉर्च अउ मोबाइल के बिना अंदर नइ जाये। गुफा के भीतरी म कइ ठक चोख्खी -चोख्खी पखरा तको रिथे जेखर ले कखरो मूड कान तको फूटे के डर रहिथे।गुफा के भीतरी जगह कम रहिथे त कोनो जगह सुत के त कोनो जगह निहरे -निहरे जाये ल पढ़थे।राज परिवार अउ पुरखा मन बताथे की ये गुफा के भीतरी, चमकीला पखरा,अजगर गुफा, चमगादड़ गुफा मीना बाजार अउ श्वेत गंगा तको हे, जेमे नहा खोर के शिवलिंग के दर्शन खतीर आघू बढ़थे।ये गुफा जाये खातीर अब्बड़ घना डोंगरी ल पार करे ल लगथे। गुफा के भीतरी चमगेदरी के मल भियाँ म बिछे रहिथे। मंडीपखोल गुफा अउ वातावरण के आनंद ले खातीर देश अउ बड़का दूरियाँ ले मनखे मन जाथे।

मंडीपखोल गुफा रहस्यमय गुफा तको हे आजतककोनो पता नइ लगा सके हे येखर छोर कतना बड़े अउ कहाँ गे हे कहिके। गुफा भीतरी कतको साप अउ जीव तको देखे ल मिलथे। चमगेदरी के मल ह खेती बाड़ी बर सोना के रूप म बुता करथे। चमगेदरी के मल ल खेत खार म डाले ले फसल के उपज म बढ़ोतरी होथे अउ बढ़िया खातू के रूप म तको बुता करथे।ये गुफा के खास बात ये हे की पर्यटक मन ल साँझ होय के पहिली गुफा ले बाहिर निकलना होथे। गुफा के भीतरी शिवलिंग करा जाये बर सीढ़ी के मदद ले ल पढ़थे अउ अब्बड़ खतरनाक गुफा भी कही सकथव ओखर सेती ये गुफा म अब्बड़ सावधानी बरते ल लगथे।

            हेमंत मसखरे (मनचल्हा )

       ग्राम -भदेरा (पैलीमेटा )