आगे देवउठनी के दिन…!!
आगे देवउठनी के दिन सुमिरबो सिरी हरिहर बिष्नु !
चौमास के पुर गे दिन मनाबो सिरी हरिहर बिष्नु !!
कातिक अंजोरी पाख एकादस
नींद ले जागयँ भगवान
लगिन बिहाव मुंडन, संगे-संग
गृह-प्रवेश के बिधान
बड़ पबरित ए दिन रिझाबो सिरी हरिहर बिष्नु !
चौमास के पुर गे दिन सुमिरबो सिरी हरिहर बिष्नु !!
तुलसी दाई ल सिंगार सजावयँ
चुरी महाउर बिंदिया
मड़वा बनय कुसियार चघावयँ
चुनरी फूल बिछिया
हरि संग बिहाव के सुदिन सजाबो सिरी हरिहर बिष्नु !
चौमास के पुर गे दिन सुमिरबो सिरी हरिहर बिष्नु !!
सुख उन्नति के देवइया
सृष्टि के पालनहार
योग शक्ति ले पठोवय
हर पेट ल ओकर अहार
मनवांछित पाए के दिन अमरबो सिरी हरिहर बिष्नु !
चौमास के पुर गे दिन समिरबो सिरी हरिहर बिष्नु !!
कवि- जोहन भार्गव जी
सेंदरी बिलासपुर (छ.ग) 7974025985
0 Comments
अपने विचार सुझाव यहाँ लिख कर हमें भेजें।