एक नवंबर शुभ दिन…!!
आवा भैया आवा बहिनी जुर-मिल जाईन !
एक नवंबर शुभ दिन, इस्थापना दिवस मनाइन !!
कई पुरखा मन करिस प्रयास
छत्तीसगढ़ बन पाइस अलग राज
पुरखा के सुरता म फूल चघाइन !
एक नवंबर शुभ दिन, इस्थापना दिवस मनाइन !!
छत्तीसगढ़िया खेल आलंपिक
आनी बानी के हमर खेल संस्कृति
मल्ल खंभ के कला देखिन देखाइन !
एक नवंबर शुभ दिन, इस्थापना दिवस मनाइन !!
हरेली तीजा पोरा कमरछट के तिहार
गुड़हा चीला नरियर खुरमी ठेठरी के बहार
संगी हीत-मीत घर खाइन अउ खवाइन !
एक नवंबर शुभ दिन, इस्थापना दिवस मनाइन !!
हरियर लुगरा म फबय महतारी
हाँत म हँसिया पाके धान बाली
छत्तीसगढ़िया सबले बढ़िया करके देखाइन !
एक नवंबर शुभ दिन इस्थापना दिवस मनाइन !!
आवा भैया आवा बहिनी जुर-मिल जाइन !
एक नवंबर शुभ दिन, इस्थापना दिवस मनाइन !!
कवि- जोहन भार्गव जी
सेंदरी बिलासपुर (छ.ग)
0 Comments
अपने विचार सुझाव यहाँ लिख कर हमें भेजें।