छत्तीसगढ़ी गीत
🌾🌾🌾🌾🌾🌾🌾🌾🌾
धर के नागर बईला तुतारी
खेत जोते बर जाथन
छत्तीसगढ़ के नगरिया बेटा
चटनी बासी म मजा उड़ाथन
खेती किसानी हमर जिनगानी
माटी म सोन उगाथन
दिन रात जाँगर टोरत
असल पसीना गिराथन
जनम धरे हन ये माटी म
माटी बर मर जाथन
छत्तीसगढ़ के नगरिया बेटा
चटनी बासी म मजा उड़ाथन।
माटी म हम उपजेन बाढेंन
माटी के गुन ल गाथन
ये माटी के सेवा करईया
माटी के लाल कहाथन
दुध पिये हन महतारी के
करजा ल अपन चुकाथन
छत्तीसगढ़ी के नगरिया बेटा
चटनी बासी म मजा उड़ाथन।
खून पसीना हमर जीनगानी
ये भूईयाँ बर अरपंण हे
धरती मईयाँ सोन चिरईयाँ
दाई के मया अडबड हे
मन के आगर जोतत नागर
गीत ददरिया गाथन
धरके नागर बईला तुतारी,
खेत जोते बर जाथन
छत्तीसगढ़ के नगरिया बेटा
चटनी बासी म मजा उड़ाथन।
🖊️ अनिल जांगडे
सरगांव मुंगेली
0 Comments
अपने विचार सुझाव यहाँ लिख कर हमें भेजें।