छत्तीसगढ़ म इच्छाधारी छत्तीसगढ़िया मन जगह-जगह देखे ल मिलथे
स्वाभिमान के भारी कमी हवय छत्तीसगढ़ के मनखे मन म
छत्तीसगढ़ राज म बने 22 बछर पुर गे हे फेर अभी तक ले छत्तीसगढ़ म छत्तीसगढ़िया मन छत्तीसगढ़ी भासा के लड़ाई बर एक मंच म नइ सकला सके हे, अगर भासा के स्वभिमान के गोठ करबो त छत्तीसगढ़ के मनखे मन ल देवत उपाधी कोनो ल बने नइ लगही काबर की छत्तीसगढ़ म इच्छाधारी छत्तीसगढ़िया मन जगह-जगह देखे ल मिलथे, जेनमन ह बेरा देख के अपन रंग ल बदल लेथे, जिन्हा राज्य के महतारी भासा छत्तीसगढ़ी हवय उंहा छतीसगढ़ी गोठियाय म मनखे ल लाज लगथे देखे म मिलथे की दूसर के आघु म या दूसर राज ले अवइया मनखे मन म तो गोठियाय नइ फेर छत्तीसगढ़ के छत्तीसगढ़िया मन के आघु म घलोक फुटानी मारे बर हिंदी म गोठियाथे जिखर से अपन आप ल जादा पढ़े लिखे होसियार समझथे जेखर सबले जादा लाभ बाहिर ले आने वाला मनखे मन उठाये हे, काबर की जेन राज म उंहा के बोली भासा संस्करीति ह बगरे नइ रहे वो राज म बाहिर के अवइया मनखे मन अपन बोली भासा संस्करीति ल बगरा के उंहा राज करे बर धर लेथे अइसने छत्तीसगढ़ संग घलोक होये हे छत्तीसगढ़ के मनखे मन के बीच म स्वाभिमान के कमी के कारन बाहिर के अवइया मनखे मन अपन संस्करीति भासा ल इंहा बगरा के अब छत्तीसगढ़िया म उंखरे भासा के परति नीचा दिखाए बर धर ले हे अउ परबुधिया छत्तीसगढ़ के मनखे मन अपन भासा के परती हिन भवाना रख के छत्तीसगढ़ी बोले बर लजाये लधर ले हे।
अनिल कुमार पाली
तारबाहर बिलासपुर
0 Comments
अपने विचार सुझाव यहाँ लिख कर हमें भेजें।